وقفت بآخر الشارع اعد الوقت وانتظره

وقفت بآخر الشارع اعد الوقت وانتظره
......................... وانا شايله معــي ورده وحلـم وكلمتين عتاب

يمر الوقت يتمخطر ويمشي خطوته بطره
......................... تقول انه يذكرني بجرحي اللي ابــد ما طاب

احرّك عقرب الساعة وكدت اتسبب بكسره
......................وانا اراقب الوقت وحسبه يعمـل للثواني حساب

بغيته ينقلب فارس يسلّ السيف من خصره
.......................ويقتــل مــا بقي من وقت يهدّي قلبي المرتاب

ورجعت اشوف هندامي ارز الطرحه والغرّه
.....................ابــي اسمعـه يمدحني وابيه يزيد بي الاعجاب

احط شوي من عطري واحط اشوي من عطره
.....................لعــلّــه ينتشـي مثلــي و يفتــح للمعانق بــاب!

سرحت بجنة احلامي أمنت لوقتي ولمكره
......................واثاري نيته لي سودا و صدقه غادر و كـذّاب

صحيت أناظر الساعة واذا هي عدّت العشرة
.....................و اقول اش أخّــره عني ؟ علامه سيد الاحباب

بلومه لاحضر هالحين وقام يقول لي عذره
...................واطنّش حيـل واتغلّـى وانا احس ان فؤادي ذاب

جلست اراجع الماضي واذا هو ما كذب مرّه
....................و لقيت اني ادور لــه عــذر اقـوى من الاسباب

تناظرني عيون الزين ولا ادري وش ورا النظره
....................اظنــّـه عارف و ساكت علامه عن عيوني غاب!

حبيبي انقضت ساعة وصبري انقضى صبره
....................وحلــم انولـــد تـــوّه اشوفــه في عيـونــي شاب

نشف دمي وانا واقفه ولا اظنه بقى قطره
.................ودمعي انسكب ما قــدرت امسـك دمعــي المنساب

ولاجل ذرة امل بقيت ..نويت اجلس الى بكره
....................لعلّــه يذكـــر احقــوقٍ يبيــها اقـــرب الاصحــاب

وقام الصبح متثاقل يجرّه في كسـل فجره
................ يقولـــّي : اعتقـــد قلبـــك من ذنــوب المسرى تـاب

جمعت حبات دمعاتي وبلعت غصّـة من الحسره
................وقمـت ابكـي على هم انحفر في داخل؟ـي سرداب

صرخت انادي على نفسي وش اللي باقي انتظره
...................مشيت و داخلــي هــــمٍّ و حلــم و كلمتيـــن عتاب